Ich wil oeg vandôog ë bïtsjë vërtèllë yùvër òuzë gràampéer Ambiorix wôo toch òuzë aàdstë sjoepsjaitër és.Sjoepsjaitër ja, dat és de aaë nòinôom van de Túngënêrë. Van bóo keump dêe nôom zult zjiè oeg mësjïn ôofvrùygë. Wôol, veulë juòrë geleeë goenk es n’e Túngënër z’n kakske plasièrë

àter ’n kërnoelëhôog dóo èr’gës ô’n Móierstrienes. ’n Boer én de wei ternèvë hôo dat gesmoes en stöok stillekes ein sjoep dùr de hôog. Òuzë Túngënêr deug bovùr ter gekomë wos mê wos héel vërtiebëltôbëld wai ter niks op de grónd zóog liggë want de boer hôo de sjoep naturlïk stillekës trùk gëtrokkë. Vandóo òuzë nòinôom. ‘t Es wôol nie veul ràars mê toch nog veul sjeunder as hinnëschelmë wai sommige os òuk wôol es djuirë nümë. 

Mê ich lüt mich ôoflèië want ich wau oeglies vertellë yùvër òuzë aàdstë bùrgër.

Ambiorix nau, wô’s ’n galjàar mèt huòr op z’n tàan. ’t Sjént dat t’er op de Lyùrë gëbuòrë wô’s èr’gës én ’n kraupkoet ô’n het Kriekëlstrùtje. Dat zjeit al veul hê want iedërein wét dat de kénder op de Lyùrë MET tàan gëbuòrë wiénnë. 
De mïnsë ammëzèirdë zich toen mèt boùmklèdderë, kramsjietë, gaasgoië en van dêe boel. Van Patria en Cerkel wô’s toen nog gein spryùkë én Ambiorix wô’s dan òuk kammërôot mèt Catavolcus, nog zo ’n Sjarel,wôo ô’n Bèlleshèskes wóndë. As het nau moes zin zuidë ze gesticheld en gebatterd hùbbë mê én dêe taid, zonder dè foebal, kostë ze mëlkàandër goed laaië. 
Ze wórë zelfs goei kammërôotë wôo mètèin goenkë vèssë ô’n Móierssleut òf op de Jèkkër.Het dint gëzàach dat er toen nog vjiès wô’ttër wô’s én de Jèkkër én dat er òuk nòg vès én zoot. Nie allein stiekeléngskes mê oak kerp, lepper en trêrwit. Nau kó’n zjiè én de Jèkkër zelfs nie mè vërdrénkë. As zjiè t’rén valt, los zjiè simpelwêeg op.

Ambiorix wuò’nt “De Poens” genumd omdat’er nogal sjôos hôo én zelfs éns de lotto van toen gewonnë hôo. “Prior” hoet dat, geluif ich. ’t Wois ’n kleine klitchie goudstùkkë wôo ter toen wôont én ze liggë nau nog te blinkë én de müzé.

Catavolcus numde ze het “Pónëkë” omdat t’er de jongstë wô’s van twêl’f jún. Èigëlïk wô’s t’er toch nogal ’n dïsténksë tùssë dai twée want de Poens wô’s gróot en stroes met veul pótëkraud terwail Pónëkë jeider ’n rèppig menneke wô’s, ’n echte kraudiegël, mê hêe wô’s wôol zo rap as ter duvel.
Hêe hôo òuk de rèppëtôsë van ’n slechtë verliezer te zin as ter én de herberg van Choufus én de Jèkkërstruò’t met de dobbelstein goenk gooië. Koijonge of bürke vangë kaantë ze toen nog nie en as zjiè van koekë kaldë méendë iedërèin dat zjiè het yùvër ètë hôo.
Bóo Ambiorix jeider ’n sjone kjèl wô’s, kos je dat van Pónëkë nie zeggë. De mïnsë zàagte dat ter zo lèllik wô’s as de nàach. Mèt z’n gebòrtë hôo z’n ma zich zo verschrik dat ze nuò hüm òuk gèin kénder mê wildê.
Mê kom, dóo geit het allëmuò’l nie yùvër. Dai twée hôonë dai spaghettikes van Rome al éntige mó’n vërdrôgë mê nau wórë ze dè Juul Cesar én zain rippers kotsmù. (Ich weet dat “rippers” ë bergoens wuò’d és mê ich ben òuk zjèiker dat zjiè het goed verstût)

“’t és altaid van ‘t èigëstë” zàag Pónëkë “Dai haaf gejaldë loupë àter ous vroule, ze zaupë òuzë wain aut tot er veur os allèin nog kielefits yùbërbléf en as het òuk mèr ’n bitche kàddër és wai nau, stún ze dóo én hún jeupkes te bibbëlë op hún bèin”.

“Ja, het zin echtë kàalaaiërs” kniktë Ambiorix.
“Zui het niet het moment zin veur ze te katteluynë én dat kënolzje trûk te joage van bóo ze gekomë zin?” zaag Pónëkë.
“Da’s ë gedàch” zàag Ambiorix “Vêe zeggë ze dat de Germanë op kûms zin dan lòupë dai bangsjietë de bèin óndër hún kont aut veur met Caesarkë én Trier te gerôkë. En óndër de bôon kan dai kjeilkes vanalles yùvërkome…”
“Ich dun mèt” zaag Pónëkë dïrrêk “én vêe gó’n nie sjïppëtièrë. Bo kó’nnë vêe ze kneu gèvë én ze op hún prai houwë dat do allein litskes yùvërblaivë?”
“Wôo dénk zjiè van de bemmë van Bloir” zàag Ambiorix.
“Dóo kó’nnë vêe piebergë spélë én ze énpriegelë as ze lengs kómë. Wai ’n houvrouw vallë vêe hún op het laif en vêe kuigëlë de hélë santebeklang de Jèkër én”.
“Das gezattë” zàag Pónëkë”
“Dè varéng van ’n Sabinus met zaïne briljentin én ze huòr hougë vêe óndër wô’ttër tot ve z’n zwèitvuut nie mè rukkë”
“Ja” zàag Ambiorix “en dè makkëmentigë Cotta z’n prai gó’n vêe zo òrdêntëlïk énpriegelë dat’er z’n eige zjëwéelë nie mè herként”

Zo gezàag, zo gedùn. Van yùvëral én Tóngerë en ùmstriekë kómë ze veur te helpë en gelûf mich: do wórë gèin trappëschaiters mèt. 

 

Dai van de Riedaik lièvërdë de buògschieters, de mannë van Broek zûrgdë veur de pjièd en van op de Lyùirë koem het voetvolk. Van aut Ketsingë wois do zelfs ’n pertekliere rauwbaus wôo aufkoem met ’n mèshoak én ein hàant én ’n rik én d’àander hàant. Het wô’s ’n kënong van ë waif, wôol goed gemôk van maul én potë mê as ze kèkdë voele de appëlë vanzelf van de buim. De kénder van Lauw hôotë hùn sjietlèrkes mètgebroch. En de gàmmêe’s van Eur woare met zichels gëwuòpënd. 

Zèlfs het Vleubergske deug mèt en sjïktë ein kënai van ’n vrouwmès wôo mèt ë brèkskë op de kèr’mës stoent én iederèin de wórd vürspeldë. ’n Aa klotstoet wôo bëkàand wô’s as het orôkel van het Vleubèrgskë. 
Nauw-Tóngërë kos nie mètdun want én dè taid stoentë dóo nog gèin hais. Dat wô’s ’n van God vergètë koté wai nau nog as vêe de téleviezë môogë geluivë.

Tjeigë zo ’n bènde hôote Cesarke en z’n prùllëmennëkes gèin sjain van ’n kans.

Op ne décemberdôog van het juòr 53 veur Jézekë gebuòrë woint, gëbeurdë het dan. Het rèngerde dat het zeikdë en het wô’s ech gein weer veur ’n hond deur te jôgë. De Rëmainë zôotë mèt ë’n ei én hún kont en trokkë toch op nuò Trier. 
Jus veur Mal ô’n de Blàa Geit gebeurdë hèt dan. Het 14
e légioen van Cesar en e‘n ôofdèiling van het zèsde lègioen, allëmuò’l metèin goed veur zo‘n 7.000 man woint tot Rëmainsë frikedellë gëdraid. Gèinë èinë kos het nuòvertellë. ’t Es nie veur beschàar te môkë mais ze vertellë dat Ambiorix ô’n dei àa eik én Bloir twée Rëmainë tegelaik ô’n zainë sôvël réeg en dat de punt nog zovàar én de bòum stôok dat ze ë boerëpjièd moestë hôlë veur hùm traut te trekkë.

Ambiorix kréeg veur dêe straffë toer’n sjïkkë stàttü op de mêert. Én 1866 wô’s het zovàar. Zèlfs de keunéng en de keunëgïn koemë nuò Tóngërë veur de voil van z’n stàttü ôof te trekkë én ’n wyùdsjë te plasièrë.

Ondertùssë és dóo veul wô’ttër deur de Jèkkër gevloitë en allëwail kómë ze van allë kàantë veur òuzë gràampéer te bewonderë. Lèstes nog zàag ë’n medam “Nou wat is me dat toch ’n fraaie jongen”. Ich dénk dat ze van Hollàand koem mais ja dóo kan ze òuk nie ô’n dun hè mais ze hôo wôol gëlaik. Ambiorix és èg ’n pièl van ’n galjàar en zo mèr met ’n houwestel trop aut trekkë wai Ambiorix deug és toch nie iedërèin gegèvë.

’t Sjént dat ‘t er òuk ech zo groot wô’s as ter dóo steit én dat het ’n zeikerë Meesen wô’s wôo môdel veur hùm gestùn hèt.” ’n Veurvôier van mich” zàag òuzë betreurdë Rik Meesen, de schoester van ô’n het àat hòspëtôol, altaid. Mê ich geluif dat nie. Qua pëstuur wô’s Rik toch geine kastàar én hè hôo toch gein lutteurs én zain fàmmïlzjë. As het yùvër gekschèrë of schildere goenk dan wôol, dan geleufdë ich het dïrrêk, mê ànës nie. 

’t Zal wôol allëmuò’l foentë zin. Mê vêe zin toch blai én fièr wai ’n wàandlaus mèt òuzë Ambiorix wôo van òus stad, èin keunëgïnstad môktë. Én dat kan nie iederèin zomèr van zain stad zeggë. 

Plaats reactie


Beveiligingscode
Vernieuwen

Inloggen